Läbe isch Chilbi Theater am Gleis 09/22

Auftragstext zum Saisoneröffnungsfestival (Spoken Word)

Für Chilbi bruchts kei Platz. Kei Liecht.
Chilbi isch immer. Will: S Läbe isch Chilbi.

Mach mal d Auge zue.

Life is a rollercoaster
Just gotta ride it

Chunsch uf d Wält.
Alles Zuckerwatte.
S git nu warm, chalt und schön oder nöd.
Kei Wörter, kei Logik.
Es git nöd mal Ziit.

Hine im Auto, wännds dänn chasch, frägsch:
Wie lang gahts no?
Niemer weisses je, aber alli tönd so, wie wänn scho:
Nuno zäh Minute, Schätzli.
S Mami luegt verliebt zu dir hindere.
Geburtstag und Wiehnacht sind ä Dekade usenand.
Es verriisst di fasch.
Immer wieder isch plötzli morn und de Summer verbi.

Paar Jahr später dini erscht Flik Flak.
Du lehrsch, dass Sache noimet afanged und noimet andersch wieder ufhöred.
Aber au, dass Sache chönd ufhöre — und nöd immer wieder afanged.
Plötzli isch d Ziit doch öppis — und s Grosmuetti nüme da.
Wännd Glück häsch, chasch beides gnüsse und mängisch vergässe.

Grösser wirsch, einewäg. Vilich au dicker. Verliebsch di.
Er sich au. Aber gli i öppert andersch.
Dis Herz brännt bim Ischnufe.

Trampsch sit do immer äxtra uf Blueme,
will‘d sit ihm s Schöne nüme vertreisch.

Du entdecksch öppis, wo heilt.
Wirsch süchtig.

Bitte Tattoos und Musig statt Koks und Klinge, hofft din Papi dihei am Handy.
De eint Chatverlauf löscht er regelmässig. Will er weisses au:
Sache wo weh tüend, chönd glichziitig au schön si.
Und umgekehrt.

Alles wos git, gits immer au in umgekehrt.

Du finsch wieder Liebi.
Und dasmal verlürsch sie du.
Wienen Zweifränkler im Sofaspalt.
Wie de Jeton fürs Büchseschüsse im Hosesack.
Furt – Fasch ohni dases merksch. Fasch chli egal. Für dich chunt no öppis Grössers, während öpper andersch brüelt, will dus gsi wärsch.

Noimet andersch lernsch öppis.
Wirsch öppis.
Zersch chli chlinner.
Dänn Gfiiret.
Stah glah.
Abgholt.
Mal uf und mal ab.

Life is a rollercoaster
Just gotta ride it

Eigets Gält.
Zügelchischte.
Unterschrifte.
To Do Lischte.
AGBs. Nöd gseh.
Doch kä Gäld – meh – schaffe.

Träumsch vode Zuekunft, bis sie da isch.
Und wänn sie schället, bisch am Handy.
Je nu.

Sie chunt mehrmals, eifach andersch verchleidet.
Als Rieserad. Als Geischterbahn. Oder als Lied, wo zuefellig im Radio lauft.

We're far from the shallow now
In the sha-ha, sha-ha-llow

Und irgendame Ort, wo dä Algoritmus vom Läbe dich aneschletzt,
gsehnder eu zum erschte Mal.

Und plötzli bisch zwei.
I dim Buch nomal es Herz.
Es nietet di um.
Und wieder gits kei Ziit meh.
Nur no wach oder nöd.
Und immer so so müed.
Wieder alles Zuckerwatte.
Ä grossi zum Teile.

Ide Ziitig staht Sogwirkung für Terroristen.
Aber du lisisch Songwriting für Terroristen.

Ide Ziitig staht Erbebentote.
Aber du lisisch Erdbeerentorte.

Du verschüchsch em Chliine z lieb alli Geischter. Aber irgendwänn chömeds gliich.
Wänn nöd zu dir, dänn zu dene näbet dra.

Dä stolz Nachber. Dr. Ing. Und chuum pensioniert: chrank worde.
Niemertem gseit. A eim Abig alei dihei, di zuefellig Empfehlig A STAR IS BORN.
D Lady Gaga isch en det, de Star.
Dä Maa näbet ihre plötzli nur no ä halbi Portion.
Sie singt. Er trinkt.
Sie überholten. Er bringt sich um.

De Nachber stiigt is Auto und fahrt zum Filmsoundtrack gradus id Tunnelwand.
Lieber nüme da, als nur so halb, fint au är.

S erscht Uber seit ab.
Ziit wird knapp.
Nähmemer halt s türscht.
S chunt en Tesla mit Flügeltüüre.
Lache tümmer ersch am Abig.
Mer haltet bitz vor de Chile.
Sicher nöd miteme Knight Rider Auto ane Beerdigung.
Mir räned di letschte paar Meter und hinder eus gaht grad Türe zue.
S Herz chlopft lüüter als de Chor vorne singt, es paar brüeled.
Nöd z luut schnufe etz.

Ufem Heiwäg im Radio d Ziile:

Die Vögel scheissen vom Himmel
Und ich schau dabei zu

Mir wird ganz trümmlig.
Tschuldigung, wie lang gahts no, frägi?
Bis kein Jeton meh häsch, seiter – und dreht d Musig uf.